किसानको आफ्नै राष्ट्रिय बजार बन्छ : कृषिमन्त्री

कृषिमन्त्री घनश्याम भुसालले देशभर किसानको आफ्नै राष्ट्रिय बजार निर्माण गर्ने बताएका छन् । सातै प्रदेशका भूमि व्यवस्था, कृषि तथा सहकारीमन्त्रीहरूसँग कृषिमन्त्री भुसालले आइतबार गरेको भर्चुअल बैठकमा आगामी आर्थिक वर्षबाटै किसानको राष्ट्रिय बजार निर्माणको काम सुरु गर्ने सहमतिसमेत भएको छ ।

सहमतिअनुसार ७ सय ५३ वटै स्थानीय तहमा कृषि सेल निर्माण सुरु गरिनेछ । ‘हरेक स्थानीय सरकारसँग आफ्नो छुट्टै संकलन विधि, भण्डारणगृह र वितरण प्रणाली हुने व्यवस्था सुरु नगरे कृषि क्षेत्र बचाउन सकिँदैन,’ भुसालले भने, ‘स्थानीय सेललाई प्रदेश र संघीय सरकारसँग जोडेर किसानको वैकल्पिक बजारको राष्ट्रिय नेटवर्क बनाइनेछ ।’

यसका लागि संघीय सरकार, प्रदेश सरकार र स्थानीय सरकारको बजेट केन्द्रित गर्ने पनि सहमति भएको छ । मन्त्री भुसालले संघीय सरकारले किसानको आफ्नै राष्ट्रिय बजार निर्माण गर्ने गरी बजेट ल्याउने जानकारी दिँदै प्रदेश सरकारहरूलाई पनि त्यहीअनुसार बजेट ल्याउन आग्रह गरेका छन् ।

प्रदेशका मन्त्रीहरूले पनि किसानले उत्पादन गरेको उपज बजारसम्म नपुग्ने, तर बजारमा भने अन्य मुलुकबाट उपभोग्य सामग्री आयात गर्नुपर्ने अवस्थाको अन्त्य गर्न किसानको राष्ट्रिय बजार निर्माण गर्ने प्रस्तावमा सहमति जनाएका छन् । ‘किसानको राष्ट्रिय बजार निर्माणले अहिलेको अस्तव्यस्तताको अन्त्य हुनेछ,’ भुसालले भने । यसका लागि राजधानी उपत्यकाका मेयरहरूसँग छलफल गरिसकेको उनले बताए ।

Leave a Reply

Your email address will not be published.