आजको मौसम अपडेट: मनसुनको न्यून चापीय रेखा सक्रिय, कुन-कुन क्षेत्रमा पर्दैछ पानी ?
काठमाडौं, भाद्र १४ गते (शनिबार) :
आज दिउँसो देशभर साधारणतया बदली रहनेछ। विशेषगरी कर्णाली प्रदेश र सुदूरपश्चिम प्रदेशको तराई र पहाडी भू-भागका केही स्थानहरूमा मध्यम वर्षाको सम्भावना रहेको विभागले उल्लेख गरेको छ।
त्यस्तै, बागमती प्रदेश र गण्डकी प्रदेश लगायत अन्य पहाडी भू-भागका थोरै स्थानहरूमा पनि मध्यम वर्षाको सम्भावना छ। तराईका एक-दुई स्थानमा भने हल्कादेखि मध्यम वर्षाको सम्भावना रहेको बताइएको छ।
आज राति पनि देशभर साधारणतया बदली रहनेछ। सबै प्रदेशका पहाडी भू-भागका केही स्थानहरूमा मध्यम वर्षाको सम्भावना रहेको छ। यसैगरी, तराई भू-भागका थोरै स्थानहरूमा पनि मध्यम वर्षाको सम्भावना रहेको विभागले जनाएको छ।
मौसमविद्हरूले वर्षाका कारण पहाडी क्षेत्रमा भू-क्षय र नदीहरूमा पानीको बहाव बढ्न सक्ने भएकाले सतर्क रहन आग्रह गरेका छन्।