आगामी तीन दिनको मौसम: पहाड र हिमालमा वर्षा तथा हिमपात, तराईमा अत्यधिक गर्मीको सम्भावना

काठमाडौँ, २० जेठ ।नेपालमा हाल उपल्लो वायुमण्डलमा रहेको पश्चिमी न्यून चापीय रेखा (trough) का साथै स्थानीय वायुको आंशिक प्रभाव देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल बागमती प्रदेश र देशका हिमाली भू-भागमा साधारणतया बादल लागेको छ भने पहाडी भू-भागमा आंशिक बदली रहेको छ। तराईका अधिकांश क्षेत्रमा भने मौसम मुख्यतया सफा रहेको छ।

आज बुधबार दिउँसो देशका हिमाली र पहाडी क्षेत्रमा साधारणतया बदली रहने र तराईमा आंशिक बदली हुने देखिन्छ। पहाडी र हिमाली भेगका केही स्थानहरूका साथै लुम्बिनी र सुदूरपश्चिम प्रदेशका तराईका एक-दुई स्थानमा मेघगर्जन र चट्याङ्गसहित मध्यम वर्षा तथा हिमपातको सम्भावना रहेको छ। यद्यपि, मधेश प्रदेशसहित कोशी, बागमती र गण्डकी प्रदेशका तराई भू-भागमा भने गर्मी बढ्ने र ‘तातो दिन’ (Heat Wave) हुने प्रक्षेपण गरिएको छ। राति भने हिमाली र पहाडी भेगमा आंशिकदेखि साधारण बदली रही कोशी प्रदेशका केही स्थान र अन्य प्रदेशका हिमाली भेगमा हल्का वर्षा वा हिमपातको सम्भावना छ।

भोलि २१ गते बिहीबार पनि मौसमको अवस्था उस्तै रहने महाशाखाले जनाएको छ। दिउँसो लुम्बिनी र सुदूरपश्चिम प्रदेश लगायत देशका पहाडी र हिमाली भू-भागका थोरै स्थानहरूमा मेघगर्जन र चट्याङ्गसहित वर्षा र हिमपातको सम्भावना छ। तराईका मधेश, कोशी, बागमती र गण्डकी प्रदेशमा तातो दिनको प्रभाव कायमै रहनेछ। राति कोशी र मधेश प्रदेश लगायत देशका विभिन्न पहाडी र हिमाली भू-भागमा हल्का वर्षा र हिमपातको सम्भावना रहेको छ।

यसैगरी, २२ गते शुक्रबार कोशी, लुम्बिनी र सुदूरपश्चिम प्रदेशका साथै देशका पहाडी र हिमाली भेगमा साधारणतया बादल लाग्नेछ। लुम्बिनी, कर्णाली र सुदूरपश्चिमका थोरै स्थानहरू र कोशी प्रदेशको तराईका एक-दुई स्थानमा मेघगर्जनसहित मध्यम वर्षाको सम्भावना छ। तराईका अन्य भू-भागमा भने गर्मीको लहर कायमै रहने देखिन्छ। राति कोशी र मधेश प्रदेश लगायत बागमती, गण्डकी, लुम्बिनी र कर्णालीका पहाडी तथा हिमाली क्षेत्रमा हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।