खोरभित्र चितुवा पसेर दशैंका लागि पालिएका ७ खसीसहित २१ बाख्रा मार्यो
काठमाडौँ: बर्दियामा गएराति चितुवा खोरभित्र पसेर एकै पटक २१ वटा खसी/बाख्रा मारिदिएको छ ।
गुलरिया नगरपालिका वडा नं. ५ को सन्तोषी टोलका चन्द्रकान्त पौडेलको कृषि पशुपंक्षी तथा बाख्रा फार्मभित्र गएराति चितुवा पसेर खसी/बाख्रा मारेको हो ।
व्यवसायी पौडेलको फर्ममा आइतबार राति १० बजेदेखि सोमबार बिहान ५ बजेको बीचमा खोरमा पसेर बाघले ७ खसी, ७ वटा माउ बाख्रा र ६ वटा साना पाठापाठी मारेको हो ।
बेलुका खोरमा थुनेर गएका २३ मध्ये २१ वटा बाख्रा मृत फेला परेको र एउटा बाख्रा हराइरहेको पौडेलले बताए । एउटा सानो बच्चो भने खोरबाट तल खसेका कारण जीवितै फेला परेको उनले बताए ।
खोरमा भएकामध्ये एउटा बाख्राको पछाडि भाग खाएको र बाँकी सबैको घाँटीबाट रगत चुसेको पाइएको पौडेलले बताए ।
वनका कर्मचारीहरुको रोहबरमा मृत बाख्रालाई गाड्न लागिएको उनले बताए ।