स्वास्थ्यका लागि बहुगुणी ‘फर्सीको मुन्टा’: यस्ता छन् यसका फाइदाहरू
हरियो सागपात मानव स्वास्थ्यका लागि प्रकृतिको अनुपम वरदान मानिन्छ। चिकित्सकहरूका अनुसार हरियो सागसब्जीको नियमित सेवनले शरीरलाई निरोगी राख्नुका साथै विशेषगरी आँखाको ज्योति तेजिलो बनाउन मद्दत गर्छ। हाम्रा करेसाबारीमा सजिलै पाइने विभिन्न सागहरूमध्ये फर्सीको मुन्टा वा पात स्वास्थ्यको दृष्टिकोणले अझ विशेष र गुणकारी मानिन्छ। फर्सी खानु आफैमा स्वास्थ्यवर्धक छ, तर यसको मुन्टा र पातको सेवनले हामीलाई धेरै प्रकारका गम्भीर रोगहरूबाट जोगाउन सक्छ।
फर्सीको मुन्टा विभिन्न पौष्टिक तत्व र खनिज पदार्थको भण्डार हो। यसमा भिटामिन ए, बी-६, सी, र ई प्रशस्त मात्रामा पाइन्छ। यसका साथै पोटासियम, फोलिक एसिड, क्याल्सियम, कपर, प्रोटिन, म्याग्नेसियम, आइरन, फाइबर र फस्फोरस जस्ता मानव शरीरलाई नभई नहुने तत्वहरू यसमा पाइन्छन्। ‘युएसडीए नेशनल न्युट्रिएन्ट’ को अध्ययनले पनि फर्सीको पातमा पाइने विभिन्न गुणहरूले मानव शरीरलाई खतरनाक रोगहरूबाट सुरक्षित राख्न मद्दत गर्ने कुरा पुष्टि गरेको छ।
फर्सीको मुन्टाको नियमित सेवनले उच्च रक्तचाप, कोलेस्ट्रोल र मुटुसम्बन्धी समस्याहरूबाट जोगाउँछ। यसमा पाइने फाइबरले कोलेस्ट्रोल नियन्त्रण गरी मुटुलाई स्वस्थ राख्न सहयोग गर्छ। साथै, यसमा रहेको ‘एन्टी-अक्सीडेन्ट’ ले बढ्दै गरेको उमेरको असरलाई कम गरी मानिसलाई जवान देखाउन मद्दत गर्छ। आँखाको स्वास्थ्यका लागि यसमा पाइने भिटामिन ‘ए’ निकै लाभदायक मानिन्छ।
यसको अर्को महत्वपूर्ण फाइदा भनेको प्रजनन क्षमतामा वृद्धि गर्नु हो। फर्सीको मुन्टाको सेवनले नष्ट भएका टेस्टीकुलर र स्पर्म बन्ने प्रक्रियालाई सक्रिय बनाउन मद्दत पुर्याउँछ। छालाको सुन्दरताका लागि पनि यो उत्तिकै प्रभावकारी छ। यसमा पाइने भिटामिन ‘सी’ ले छालाका मृत तन्तुहरूलाई जीवित बनाउनुका साथै छालालाई स्वस्थ र चमकदार राख्छ। मधुमेहका रोगीहरूका लागि पनि फर्सीको मुन्टा वरदान साबित हुन्छ, किनकि यसमा हुने ‘हाइपोग्लिसिएमिक’ तत्वले रगतमा ग्लुकोजको मात्रालाई कम गराउँछ।
क्यान्सर जस्तो असाध्य रोग विरुद्ध लड्ने क्षमता पनि फर्सीको पातमा हुन्छ। यसमा पाइने फाइबरले क्यान्सरका कोषिकाहरूलाई बढ्नबाट रोक्न मद्दत पुर्याउने चिकित्सकहरूको भनाइ छ। यसका साथै फर्सीको मुन्टाले हाम्रो पाचन प्रणालीलाई बलियो र स्वस्थ राख्छ। जब पाचन प्रणाली दुरुस्त हुन्छ, शरीर धेरै प्रकारका रोगहरूबाट स्वतः सुरक्षित रहन्छ। त्यसैले, स्वस्थ जीवनशैलीका लागि फर्सीको मुन्टालाई हाम्रो नियमित भोजनमा समावेश गर्नु बुद्धिमानी हुन्छ।