बागमती नहरमा पानी छाडेपछि किसान खुशी

सर्लाही, असार २२ गते । सर्लाही र रौतहटमा सिँचाई सुविधा उपलब्ध गराउँदै आएको बागमती सिँचाई आयोजनाले आइतबारदेखि नहरमा पानी छाडेपछि किसान खुशी भएका छन् ।

नहर मर्मत भैरहेको भन्दै असार सक्किनै लाग्दा नहरमा पानी नछाड्दा किसान निराश भएका थिए । मर्मतको काम सकेर सर्लाहीतर्फ आइतबारदेखि र रौतहटतर्फ सोमबारदेखि पानी छाडिएको बागमती सिँचाई आयोजनाका प्रमुख विनयकुमार गामीले जानकारी दिनुभयो । उहाँका अनुसार सर्लाहीतर्फ प्रतिसेकेण्ड २० हजार लिटर र रौतहटतर्फ प्रतिसेकेण्ड १७ हजार लिटर पानी पठाइएको छ ।

आयोजनाले सर्लाहीमा २२ हजार छ सय र रौतहटमा २३ हजार हेक्टर खेतीयोग्य जमिनमा सिँचाई सुविधा पु¥याउँदै आएको छ । सर्लाहीतर्फ पछिल्लो समय पाँच हजार भन्दा बढी खेतीयोग्य जमिन थप भएका आयोजनाले जनाएको छ ।

किसानबाट केही समय अघिदेखि नै पानीको माग भए पनि नहर मर्मत गर्न समय लागेकाले ढिलो गरी पानी छाडिएको आयोजना प्रमुख गामीले बताउनुभयो ।

पर्याप्त वर्षा भैनसकेकाले खोलामा पानी नहुञ्जेल शाखा नहरहरुमा पालैपालो पानी छाडिने छ ।
बागमती नगरपालिका–१०, शङ्करपुरका किसान रामबहादुर खत्रीले नहरमा पानी आएपछि रोपाइँको तयारीमा जुटेको बताउनुभयो ।

बागमती सिँचाई आयोजनाले नहरमा पानी छाडेपछि पश्चिमी भेगका किसान खुशी भए पनि आकाशे वर्षाको भरमा खेती हुने जिल्लाका अरु क्षेत्रका किसान भने पर्याप्त वर्षा नहुँदा निराश भएका छन् । ठूलो पानी पर्न नसक्दा जिल्लाका किसानले राखेको धानको बीउ समेत सुक्न थालेको छ । यस वर्ष बैशाख÷जेठको खडेरीले सर्लाहीका किसानले लगाएको मकै सखाप भएको थियो ।गोरखापत्र

Leave a Reply

Your email address will not be published.