पाँच हजार रोपनीको तरकारी नष्ट
पर्वत — असिनापानीले जिल्लाका प्रायः क्षेत्रमा क्षति पुर्याएको छ । पर्वत र बागलुङका मुख्य तरकारी पकेट क्षेत्रको तरकारी र फलफूलमा आइतबारको असिनापानीले ठूलो क्षति पुर्याएको कृषि ज्ञान केन्द्रले जनाएको छ ।
असिनाले बेमौसमी तरकारी, फलफूल र थन्काउने बेलाको गहुँ, जौलगायत बालीमा क्षति पुर्याएको किसानले बताएका छन्। कतिपय गाउँमा गोड्ने समयका मकैसमेत असिनाले थिचेको छ। यसअघि समेत दुई पटक परेको असिनाले कुस्मा र गलकोट नगरपालिका, जलजला र मोदी गाउँपालिकामा क्षति पुर्याएको थियो। तिनै गाउँमा समेत आइतबारको असिनाले केही बाँकी रहेको तरकारी बालीमा शतप्रतिशत क्षति पुर्याएको किसानको गुनासो छ। ‘अस्तिअस्तिको असिनाले अलिअलि जोगिएको पनि अहिले सोत्तर परेको छ,’ जलजला–८ का रामु सुवेदीले भने, ‘दुःख जति माटोमा गयो।’
असिनाले सबैभन्दा धेरै महाशीला र पैयुँ गाउँपालिकामा क्षति पुर्याएको छ। करिब एक किलोसम्मका असिना परेको पैयुँ–७ की उमादेवी बस्यालले बताइन्। ‘मसला पिस्ने लोरा जत्रै असिना परेका छन्,’ उनले भनिन्, ‘खेतीबालीको कुरै नगरौं। रुखका बोक्रासमेत खोल्सिएका छन्।’ फलेवास, जलजला, बिहादी, पैंयु र छिमेकी जिल्ला बागलुङको जैमिनीमा समेत असिनाले करोडौं रुपैयाँको अन्न, तरकारी र फलफूलमा क्षति पर्याएको कृषि ज्ञान केन्द्र पर्वतका प्रमुख वासुदेव रेग्मीले बताए।
‘क्षतिको विवरण संकलन हुँदै छ,’ रेग्मीले भने, ‘अन्नबालीभन्दा तरकारी र फलफूलमा धेरै क्षति भएको छ।’ सुन्तला, आँप, लिचीलगायत फलफूल फुल्ने समय भएकाले असिनाले फूल झारेपछि बोट रित्तै भएको उनको भनाइ छ। ज्ञान केन्द्रले संकलन गरेको विवरणअनुसार हालसम्म करिब पाँच हजार रोपनी क्षेत्रफलको तरकारी, फलफूल तथा अन्नबाली नष्ट भएको छ।कान्तिपुर