जीवन धान्न ज्यानको बाजी राखेर माछा मार्न त्रिशुलीमा हेलिन्छन मजदुरहरु
धादिङ-
निषेधाज्ञाका कारण मजदुरी गर्न नपाएपछि अब के खाने भन्ने चिन्तामा छन- मजदुरहरु । जस्ले गर्दा जोखिम मोलेर त्रिशुली नदीमा माछा मार्ने काम गर्न हेलिन्छन ।
लक डाउनका कारण विहान बेलुकी हात मुख जोर्न समेत धौ धौ हुन थालेपछि अब के गर्ने भन्दै मजदुरहरु यस्तो काममा लागेका हुन । दिनभरि माछा मार्दा आधादेखि एक किलो जम्मा हुन्छ ।
विक्रि भए सात आठ सय रुपैँया आउँछ । त्यही पैसाले लक डाउनको समयमा विहान बेलुकीको गर्जो टार्नका लागि सहयोग पुग्ने गरेको उनीहरु बताउँछन ।
त्रिशुली नदी किनारामा बसी दिनभरि बालुवा उठाई त्यसको विक्रिबाट घर खर्च चलाउदै आएका धादिङका बालुवा मजदुरहरु अहिले बालुवा विक्रि नहुँदा र मजदुरी गर्न नपाउँदा समस्यामा परेको गुनासो गर्छन ।
विहान बेलुकीको गर्जो टार्न र कोठा भाडा बुझाउन समेत लक डाउनका कारण समस्या परेको उनीहरुको दुखेसो छ ।
सरकारले कोरोना महामारीको नियन्त्रण र रोकथामका लागि आव्हान गरेको निषेधाज्ञाको समय करिव एक महिना भइसकेको छ ।
त्यसो त जिल्लामा रहेका अधिकांश मजदुरी गर्नेहरुको अवस्था दयनीय बनेको छ ।
विहान बेलुकीको छाक टार्नसमेत मजदुरी गर्न नपाउँदा निकै समस्या परेको भन्दै सरकारले आफुहरुलाई विषेश राहात प्याकेजको ब्यवस्था गर्नुपर्ने माग उनीहरुको छ ।
धादिङका नदी र खोलामा बालुवा चाल्ने सयौँ मजदुरहरु अहिले यस्तै समस्यामा परेका छन ।
गत वर्षको कोरोना संक्रमणको रोकथाम र नियन्त्रणका लागी गरिएको लक डाउनमा त विभिन्न संघ संस्थाहरुले राहात समेत दिएका थिए तर यस पटक कुनैपनि संघ संस्थाहरुले यस्तो बर्गका मानिसहरुलाई सहयोग नगरेको उनीहरुको भनाइ छ ।
सरकारले समेत विपन्न वर्गका मानिसहरुलाई बेवास्ता गरेको आरोप उनीहरुले लगाएका छन ।।