कृषि प्रधान देशमा परनिर्भरताको कहालीलाग्दो चित्र: १० महिनामै साढे ३५ अर्बको धान-चामल आयात
काठमाडौँ ।
भन्सार विभागले आइतबार सार्वजनिक गरेको पछिल्लो तथ्याङ्कअनुसार, उक्त अवधिमा कूल ३५ अर्ब ५३ करोड ८० लाख १२ हजार रुपैयाँ बराबरको ६ लाख ९८ हजार ९०५ दशमलव ९८ मेट्रिक टन धान, चामल र धानको बीउ आयात भएको हो। यसरी ठूलो परिमाणमा मुख्य खाद्य बाली आयात हुँदा मुलुकबाट अर्बौं रुपैयाँ बाहिरिएको छ भने सरकारले यसबाट ३ अर्ब २२ करोड २३ लाख ६९ हजार रुपैयाँ राजस्व सङ्कलन गरेको छ।
आयातको विस्तृत विवरण:
विभागको तथ्याङ्क केलाउँदा सबैभन्दा बढी धान आयात भएको देखिन्छ। यस अवधिमा:
-
धान: १८ अर्ब ९५ करोड ५२ लाख ४ हजार रुपैयाँको ४ लाख ९५ हजार १३८ दशमलव ६१ मेट्रिक टन।
-
अन्य चामल: ८ अर्ब ९९ करोड ३९ लाख २९ हजार रुपैयाँको १ लाख ३६ हजार ७४४ दशमलव ६८ मेट्रिक टन।
-
बासमती चामल: ६ अर्ब ५४ करोड १५ लाख ६७ हजार रुपैयाँको ५९ हजार ६३४ दशमलव १९ मेट्रिक टन।
-
धानको बीउ: ८१ करोड ८२ लाख ९३ हजार रुपैयाँको १ हजार ८५० दशमलव ७९ मेट्रिक टन।
-
कनिका: २२ करोड ८२ लाख ८४ हजार रुपैयाँको ५ हजार ५३३ दशमलव ३४ मेट्रिक टन।
-
ब्राउन चामल: ७ लाख ३६ हजार रुपैयाँको ४ दशमलव ३५ मेट्रिक टन।
मुख्य खाद्य बालीमै यति ठूलो रकम बाहिरिनुले देशको कृषि उत्पादन, उत्पादकत्व र सरकारी नीतिहरूको समीक्षा गर्नुपर्ने अवस्था सिर्जना भएको विज्ञहरू बताउँछन्। किसानलाई समयमै मल, बीउ, सिँचाइ र उचित बजारको अभाव भइरहँदा धान-चामल जस्तो प्रमुख खाद्यान्नमा परनिर्भरता चुलिँदै जानु चिन्ताजनक विषय हो।