आज दिनभरि नै वर्षाको सम्भावना,चार प्रदेशमा भारी वर्षाको चेतावनी
काठमाडौं, श्रावण १२ गते।
विभागले जारी गरेको मौसम पूर्वानुमान बुलेटिनअनुसार आज दिउँसो देशभर साधारणतया बदली रहनेछ। बागमती, गण्डकी, र लुम्बिनी प्रदेश लगायत देशका पहाडी भू-भागका धेरैजसो स्थानमा मेघगर्जन र चट्याङसहित मध्यम वर्षाको सम्भावना छ। बाँकी तराईका केही स्थानमा पनि यस्तै मौसम रहनेछ।
यसैगरी, कोशी प्रदेशको तराई तथा बागमती, गण्डकी र लुम्बिनी प्रदेशका पहाडी भू-भागका एक-दुई स्थानमा भारी वर्षाको समेत सम्भावना रहेको विभागले जनाएको छ।
आज राति पनि देशभरको मौसम साधारणतया बदली रहनेछ। गण्डकी प्रदेश लगायत अन्य पहाडी भू-भागका केही स्थानमा र तराईका थोरै स्थानमा मेघगर्जन/चट्याङसहित मध्यम वर्षा हुनेछ। राति विशेषगरी गण्डकी प्रदेशको पहाडी भू-भागका एक-दुई स्थानमा भारी वर्षा हुन सक्ने पूर्वानुमान छ।
विभागले भारी वर्षाको सम्भावना रहेका क्षेत्रहरूमा भू-क्षय, पहिरो तथा गेग्रान बहावको जोखिम रहने र नदी नाला तथा खहरे खोलाहरूमा पानीको सतह बढ्न सक्ने भएकाले आवश्यक सतर्कता अपनाउन सबैमा अनुरोध गरेको छ। साथै, मेघगर्जन/चट्याङबाट हुन सक्ने सम्भावित जोखिमबाट बच्न पनि आग्रह गरिएको छ।