देशभर मनसुनी वर्षा, गण्डकी प्रदेशमा भारी वर्षाको सम्भावना
काठमाडौं, साउन १४ गते।
विभागले आज दिउँसोका लागि जारी गरेको पूर्वानुमान अनुसार देशभर मौसम साधारणतया बदली रहनेछ। विशेषगरी सुदूरपश्चिम प्रदेश लगायत देशका पहाडी भू-भागका धेरै स्थानहरूमा मेघगर्जन र चट्याङसहित मध्यम वर्षा हुनेछ। त्यस्तै, बाँकी तराईका थोरै स्थानहरूमा पनि मध्यम वर्षाको सम्भावना रहेको छ।
आज राती देशको पहाडी भू-भागमा साधारणतया बदली रहि तराईमा भने आंशिक बदली रहनेछ। रातीको समयमा पहाडका थोरै स्थानहरूमा र तराईका एक-दुई स्थानमा मेघगर्जन/चट्याङसहित मध्यम वर्षा हुन सक्ने विभागले पूर्वानुमान गरेको छ।
विभागले गण्डकी प्रदेशका पहाडी भू-भागका एक-दुई स्थानमा भारी वर्षाको समेत सम्भावना रहेको भन्दै विशेष सतर्कता अपनाउन आग्रह गरेको छ। भारी वर्षाका कारण उक्त क्षेत्रमा बाढी, पहिरो तथा डुबानको जोखिम बढ्न सक्ने भएकाले नदी तटीय क्षेत्र तथा कमजोर भू-बनोट भएका पहाडी भेगका बासिन्दालाई उच्च सतर्कता अपनाउन अनुरोध गरिएको छ। साथै, वर्षाका कारण यातायात तथा दैनिक जनजीवनमा पर्न सक्ने असरबारे पनि सचेत रहन सुझाइएको छ।