देशभर मनसुनी वर्षा, कोशी प्रदेशमा धेरै भारी वर्षाको सम्भावना
काठमाडौं, आषाढ ३२ :
महाशाखाले आज दिउँसो र रातीको मौसम पूर्वानुमान सार्वजनिक गर्दै केही प्रदेशहरूमा भारीदेखि धेरै भारी वर्षाको सम्भावना रहेकोले आवश्यक सतर्कता अपनाउन सबैलाई आग्रह गरेको छ।
महाशाखाका अनुसार आज दिउँसो देशभर मौसम सामान्यतया बदली रहनेछ। कोशी, मधेश, बागमती, गण्डकी र लुम्बिनी प्रदेशका धेरैजसो स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। बाँकी प्रदेशका केही स्थानमा पनि यस्तै वर्षाको पूर्वानुमान गरिएको छ।
विशेषगरी, कोशी प्रदेशका थोरै स्थानहरूमा भारीदेखि धेरै भारी वर्षा हुनसक्ने चेतावनी दिइएको छ। साथै, मधेश, बागमती, गण्डकी र लुम्बिनी प्रदेशका एक-दुई स्थानमा भारी वर्षाको पनि सम्भावना रहेको छ। देशका उच्च-पहाडी तथा हिमाली भू-भागका थोरै स्थानहरूमा हल्कादेखि मध्यम वर्षा वा हिमपात हुन सक्नेछ। कोशी र मधेश प्रदेशका तराई क्षेत्रमा हावाहुरीको पनि सम्भावना रहेको छ।
आज राती देशभरको मौसम आंशिकदेखि सामान्यतया बदली रहनेछ। कोशी, मधेश र सुदूरपश्चिम प्रदेशका साथै देशका पहाडी भू-भागका केही स्थानमा मेघगर्जन/चट्याङसहित हल्कादेखि मध्यम वर्षा हुनेछ।
राती कोशी, मधेश र सुदूरपश्चिम प्रदेशका एक-दुई स्थानमा भारी वर्षाको सम्भावना रहेको महाशाखाले जनाएको छ। मधेश प्रदेशका केही स्थानमा भने हावाहुरी चल्न सक्नेछ।
भारी वर्षाका कारण नदीनालामा पानीको बहाव बढ्ने, बाढी, पहिरो तथा भू-क्षयको जोखिम रहने हुनाले सम्बन्धित क्षेत्रका बासिन्दालाई आवश्यक सतर्कता अपनाउन महाशाखाले अनुरोध गरेको छ। वर्षाका कारण सडक तथा हवाई यातायातमा समेत सामान्य अवरोध आउन सक्ने भएकाले यात्रा गर्नुअघि मौसमको अवस्थाबारे जानकारी लिन पनि सुझाइएको छ।