कृषि प्रधान देशको तितो यथार्थ, गत वर्ष ६० अर्बभन्दा बढीको खाद्यान्न आयात
काठमाडौँ : नेपालले गत आर्थिक वर्ष २०८१/८२ मा ६० अर्ब ७८ करोड रुपैयाँ बराबरको खाद्यान्न आयात गरेको छ। आफूलाई ‘कृषि प्रधान देश’ भनेर चिनाउने नेपालले यति ठूलो रकमको खाद्यान्न विदेशबाट किनेर उपभोग गरेको भन्सार विभागको तथ्यांकले देखाएको हो।
यो तथ्यांकले देश खाद्यान्नमा परनिर्भर बन्दै गएको डरलाग्दो चित्र प्रस्तुत गरेको छ। उत्पादनमा कमी, युवा जनशक्तिको विदेश पलायन, सिँचाइको अभाव, उन्नत बीउ र मलको सहज उपलब्धता नहुनु तथा सरकारी नीतिको फितलो कार्यान्वयन जस्ता कारणले आन्तरिक उत्पादनले माग धान्न सकेको छैन।
बर्सेनि अर्बौं रुपैयाँ खाद्यान्न आयातमा बाहिरिँदा यसले देशको अर्थतन्त्रमा नकारात्मक असर पारेको छ भने खाद्य सुरक्षामा समेत गम्भीर चुनौती थपिएको छ। सरकारले कृषि क्षेत्रलाई प्राथमिकतामा राखेको बताए पनि आयातको यो आँकडाले नीति र वास्तविकताबीचको खाडललाई स्पष्ट पारेको छ।