गाउँको स्वादले लोभ्यायो सहर: रेस्टुरेन्टदेखि हाटबजारसम्म ‘फापरको फुरौला’ को बढ्दो माग
काठमाडौं :
विशेषगरी फापरको पिठोमा प्याज, टिमुर र अन्य स्थानीय मसला मिसाएर तेलमा तारिने फुरौला स्वादमा कुरकुरे र फरक हुन्छ। पहिले गाउँघर र जाडो मौसममा मात्र सीमित यो परिकारले अब व्यावसायिक रूप लिन थालेको छ। रैथाने कृषि हाटबजारमा फापरको फुरौला बेच्दै गरेकी हिक्का कुमारी भुजेलका अनुसार, सहरमा यसको माग उल्लेख्य रूपमा बढेको छ। “यहाँ हरेक शुक्रबार लाग्ने मेलामा फुरौला र सेलरोटी बेच्न हामीलाई भ्याइनभ्याइ हुन्छ,” उहाँले भन्नुभयो, “फरक स्वाद खोज्नेहरू र स्वास्थ्यप्रति सचेत ग्राहकहरूले धेरै मन पराउनुहुन्छ।”
फापर जस्ता रैथाने अन्नबाट बन्ने यस्ता परिकारले नेपाली खाद्य संस्कृति र पहिचानलाई जीवन्त राख्न मद्दत पुर्याएका छन्। स्वास्थ्यप्रति सचेत नयाँ पुस्ताले ग्लुटिन-रहित र पोषक तत्वले भरिपूर्ण फापरका परिकार खोज्न थालेपछि यसको बजार विस्तार भएको हो।
सहरमा रैथाने परिकारको माग बढ्दा यसले लोप हुन लागेका परम्परागत बालीको संरक्षणमा समेत टेवा पुगेको छ। बजार अभावमा फापर खेती घटाउँदै गएका किसानहरू अहिले आफ्नो उत्पादनले राम्रो मूल्य पाउन थालेपछि पुनः उत्साहित भएका छन्। यसले ग्रामीण अर्थतन्त्रलाई चलायमान बनाउनुका साथै किसानको आयस्तरमा समेत सुधार ल्याएको छ।
यसरी, फापरको फुरौलाको एक प्लेटले सहरियालाई मौलिक स्वाद मात्र चखाएको छैन, गाउँको अर्थतन्त्रलाई बलियो बनाउँदै लोप हुन लागेको खाद्य संस्कृतिलाई समेत जीवन्त राख्न महत्त्वपूर्ण भूमिका खेलेको छ।