आज सुदूरपश्चिम र कर्णालीमा भारी वर्षाको सम्भावना, तराईमा हुरीबतासको चेतावनी
काठमाडौं, भाद्र ०९।
विभागको मौसम पूर्वानुमान महाशाखाका अनुसार आज दिउँसो देशभर साधारणतया बदली रहनेछ । कर्णाली र सुदूरपश्चिम प्रदेशका पहाडी तथा तराईका धेरैजसो ठाउँमा मध्यम वर्षाको सम्भावना छ। यसैगरी, यी दुई प्रदेशका एक-दुई स्थानमा भारी वर्षाको समेत पूर्वानुमान गरिएको छ। बाँकी प्रदेशका पहाडी भू-भागका केही र तराईका थोरै स्थानमा मध्यम वर्षा हुने महाशाखाले जनाएको छ।
साथै, लुम्बिनी र सुदूरपश्चिम प्रदेशको तराई क्षेत्रमा हावाहुरी चल्न सक्ने भएकाले सचेत रहन आग्रह गरिएको छ।
यसैगरी, आज राति पनि देशभरको मौसम सामान्यतया बदली नै रहनेछ। महाशाखाका अनुसार राति बागमती, गण्डकी र सुदूरपश्चिम प्रदेशका केही स्थानहरूमा मध्यम वर्षाको सम्भावना छ। देशका बाँकी पहाडी र तराई भू-भागका थोरै स्थानमा पनि हल्कादेखि मध्यम वर्षा हुन सक्नेछ। विशेषगरी लुम्बिनी र सुदूरपश्चिम प्रदेशका तराई भू-भागका एक-दुई स्थानमा भारी वर्षाको सम्भावना रहेको छ।
भारी वर्षाका कारण पहाडी भू-भागमा पहिरो तथा गेग्रान बहावको जोखिम रहन सक्ने, नदीनाला तथा खहरे खोलाहरूमा पानीको सतह बढ्न सक्ने र यातायात क्षेत्र प्रभावित हुन सक्ने भन्दै महाशाखाले आवश्यक सतर्कता अपनाउन सबैमा अनुरोध गरेको छ।