बेमौसमी फूलप्रति किसानको आकर्षण

भक्तपुर,मौसमी फूलभन्दा बेमौसमी फूलबाट राम्रो आम्दानी भएपछि भक्तपुरका किसान बेमौसमी फूलखेतीतर्फ आकर्षित भएका छन् । बेमौसमी फूलखेतीबाट किसानले प्रतिबोट एक हजार रुपियाँसम्म आम्दानी गरेपछि भक्तपुरका किसान बेमौसमी फूलखेतीतर्फ आकर्षित भएका हुन् ।
सूर्यविनायक नगरपालिकाले विगत एक दशकअघिदेखि व्यावसायिक फूलखेती हुँदै आएको वडा नं. ७ गुण्डुमा फूलखेतीको पकेट क्षेत्रका रूपमा विकास गर्ने तयारी गरेको छ । नगरपालिकाले गत वर्ष बेमौसमी थुङ्गे फूलको बेर्ना उत्पादन गरी ४५६ जना किसानलाई फूलको बेर्ना वितरण गरी किसानलाई बेमौसमी फूलखेतीतर्फ आकर्षित गरेको छ ।

राष्ट्रिय कृषक महासङ्घ भक्तपुरका कोषाध्यक्ष एवं सूर्यविनायक नगरपालिका वडा नं. ७ का किसान अनिता बस्नेतले अहिले मौसमी फूलभन्दा बेमौसमी फूलबाट राम्रो आम्दानी भएपछि किसान बेमौसमी फूलखेतीतर्फ आकर्षित भएको बताउनुभयो । उहाँका अनुसार असारमा रोपेको फूलले भदौको पहिलो हप्तादेखि नै आम्दानी दिने र किसानले भदौदेखि अहिलेसम्म फूल टिपिरहेकाले किसान बेमौसमी सयपत्री फूलको खेतीतर्फ आकर्षित भएका हुन् ।
परम्परागतरूपमा रोपिँदै आएको मौसमी सयपत्री, थुङ्गे र मखमली फूलमा ढुसी, डडुवा र डाँठ कुहिने रोग लाग्ने र उत्पादन पनि क्रमिकरूपमा कम हुँदै गएपछि किसान बेमौसमी फूलखेतीतर्फ आकर्षित भएको बस्नेतले बताउनुभयो । उहाँले भन्नुभयो, यस वर्षदेखि किसानले मौसमी सयपत्री फूल व्यक्तिगत प्रयोजनाका लागि मात्र लगाएको र व्यावसायिक खेतीका लागि भने बेमौसमी सयपत्री र थुङ्गे फूल नै लगाइएको छ ।

फूलबाट राम्रो आम्दानी हुने भए पनि बजारको अभावमा बिचौलिया हाबी हुँदा किसानले मेहेनत अनुसारको आम्दानी प्राप्त गर्न नसकेको गुनासो उहाँको छ । नगरपालिकाले बजारको व्यवस्थापन गर्नुपर्ने, फूल खेतीको पकेट क्षेत्र घोषणा गरी त्यस्ता पकेट क्षेत्रमा नगरपालिकाले थप अनुदान दिएर किसानलाई फूलखेतीतर्फ आकर्षित गर्नुपर्ने सुझाव उहाँको छ ।

सूर्यविनायक नगरपालिका कृषि शाखा प्रमुख रामचन्द्र सापकोटाले नगरपालिकाले बेमौसमी सयपत्री फूलका लागि दुई लाख रुपियाँ अनुदान दिएर किसानलाई बेमौसमी फूलखेतीतर्फ आकर्षित गरेको बताउनुभयो । उहाँका अनुसार व्यावसायिक फूल खेती हुँदै आएका गुण्डुका ४५६ जना किसानलाई नगरपालिकाले फूलको बिरुवा अनुदान दिएको छ । गत सोमबारसम्मको तथ्याङ्क अनुसार किसानले करिब दुई करोड रुपियाँ आम्दानी गरेका छन् । नगरपालिकाले गुण्डुलाई पुष्प पकेट क्षेत्र घोषणा गरी व्यावसायिक फूलखेतीको रूपमा विकास गर्ने योजना बनाएको उहाँले बताउनुभयो ।

सूर्यविनायक नगरपालिकाको वडा नंं. ७ गुण्डुसँगै वडा नं. १ को सिरुटार, वडा नं. ४ को दधिकोट, ५ र ६ (कटुञ्जे), र वडा नं. ८ सिपाडोल, चाँगुनारायण नगरपालिकाको वडा नं. ६ नगरकोटलगायतका स्थानमा व्यावसायिक फूलखेती गर्न थालिएको छ ।

जिल्ला समन्वय समिति भक्तपुरले भने सूर्यविनायक नगरपालिकाका अन्य थप वडामा व्यावसायिक फूलखेती हुँदै आएको र जिल्लाका अन्य नगरपालिकामा विभिन्न स्थानमा फूलखेतीको सम्भाव्यता अध्ययन गरी किसानलाई व्यावसायिक फूलखेतीतर्फ आकर्षित गर्नुपर्ने जनाएको छ । गोरखापत्र

Leave a Reply

Your email address will not be published.