चुच्चे खोलाको खुवा: अनिताको उद्यमशीलताले रोक्दै विदेश पलायन, स्वदेशमै देखाउँदै अवसर

हेटौंडा

– मकवानपुरको हेटौंडा उपमहानगरपालिकास्थित चुच्चे खोला यतिबेला अनिता तिमिल्सिना र उहाँको परिवारको लगन र मेहनतले थप चिनिएको छ। उहाँले सञ्चालन गर्दै आउनुभएको ‘श्री कृष्ण खुवा भण्डार’ खुवा पसल मात्र नभई, स्थानीय पहिचान र युवालाई स्वदेशमै उद्यमी बन्न प्रेरित गर्ने एक सफल कथा बनेको छ। वि.सं. २०३६ सालमा उहाँका ससुराले सुरु गर्नुभएको यो व्यवसाय आज अनिताको कुशल व्यवस्थापनमा झनै फस्टाएको छ र एक प्रतिष्ठित ब्राण्डको रुपमा स्थापित भएको छ।

“यो बाटो हिँड्ने जो कोहीले पनि श्री कृष्ण खुवा भण्डारको खुवा र कुरौनी नचाखी धरै पाउँदैनन्,” अनिता गर्वका साथ भन्नुहुन्छ। उहाँको पसलको प्रसिद्धि यति छ कि टाढा-टाढाबाट पनि मानिसहरु यहाँको खुवाको स्वाद लिन आइपुग्छन्।

तर, अनिताको सफलता खुवा व्यवसायमा मात्र सीमित छैन। उहाँ सामाजिक सञ्जालमा अरुले राखेको आकर्षक प्रोफाइल फोटो हेरेकै भरमा विदेशिने युवाहरुको जमात देखेर चिन्तित हुनुहुन्छ। यही चिन्तालाई उहाँले अवसरमा बदल्नुभएको छ। “विदेश जान ऋण माग्न आएका एक युवालाई हामीले भैंसी पाल्न लगानी गरिदियौं,” उहाँले एक प्रेरणादायी उदाहरण प्रस्तुत गर्दै भन्नुभयो, “अहिले उहाँ १५ वटा भैंसीको मालिक बन्नुभएको छ र उत्पादित दूध हाम्रै खुवा पसलमा बेच्नुहुन्छ।” यसले ती युवालाई आर्थिक रुपमा सक्षम बनाउनुका साथै अरुलाई पनि स्वदेशमै केही गर्न सकिन्छ भन्ने आशा जगाएको छ।

श्री कृष्ण खुवा भण्डारको आफ्नै पहिचान छ, जसलाई उनीहरु एउटा नाराले व्यक्त गर्छन्: “चुच्चे खोलालाई चिनाएको खुवाले, खुवालाई चिनाएको हाम्रो बुवाले।” यो भनाइले उनीहरूको व्यवसाय र स्थानबीचको गहिरो सम्बन्ध मात्र दर्शाउँदैन, पुस्तौंदेखिको समर्पणलाई पनि उजागर गर्छ। पसलमा हरेक एक घण्टामा करिब ६ किलो ताजा खुवा तयार हुन्छ। “दाउरामा पकाएको खुवाको स्वाद नै बेग्लै हुन्छ, त्यसैले पनि ग्राहकले औधी रुचाउनुहुन्छ,” अनिताले खुवाको विशेषता बताउनुभयो।