उजाड पाखो बन्यो आकर्षक गन्तव्य : नुवाकोटको घ्याङस्वारामा चिया र फलफूलले फेरिँदै मुहार
नुवाकोट : कुनै समय बनमारा र झाडीले ढाकिएको उजाड पाखो अहिले हरियाली चिया बगान र फलफूलका बोटले सजिएको छ भन्दा पत्याउन गाह्रो होला । तर, नुवाकोटको पञ्चकन्या गाउँपालिका–४ मा अवस्थित ऐतिहासिक तथा धार्मिक क्षेत्र घ्याङस्वाराले यही असम्भवलाई सम्भव बनाएको छ । स्थानीयको प्रयासमा उजाड डाँडा अहिले आन्तरिक पर्यटकको आकर्षक गन्तव्य र आम्दानीको स्रोत बन्न थालेको छ ।
“गर्ने इच्छाशक्ति भए बाँझो जमिनबाट पनि सुन फलाउन सकिन्छ” भन्ने भनाइलाई घ्याङस्वाराको पाखोले चरितार्थ गरेको छ । यहाँको काम नलाग्ने झाडी फाँडेर अहिले करिब १२ हजारभन्दा बढी चियाका बोटहरू हुर्किरहेका छन् भने अझै हजारौबोट चिया फलफुल लगाउन खाडलहरु तयार हुदै छ ,जसले पाखोलाई हराभरा बनाउँदै मनमोहक दृश्य प्रदान गरेको छ । चियाको हरियालीले यस क्षेत्रको मुहार मात्र फेरेको छैन, स्थानीयका लागि आर्थिक समृद्धिको ढोका पनि खोलेको छ ।
चिया बगान मात्र होइन, यस क्षेत्रलाई एक एकीकृत कृषि फार्मको रूपमा विकास गरिएको छ । झाडी फाँडिएको ठाउँमा खुर्पानी, सुन्तला, एभोकाडो र ओखरजस्ता बहुमूल्य फलफूलका बिरुवा रोपिएका छन्, जसले निकट भविष्यमै उत्पादन दिने अपेक्षा गरिएको छ । यसका साथै, यहाँ प्राकृतिक रूपमा रहेका काफलका घना बोटहरूले फल्ने मौसममा यहाँ आउने पर्यटकलाई स्वादिलो ‘अमृत’ चखाउनेछन् ।
यस क्षेत्रको पर्यटकीय महत्त्वलाई धार्मिक आस्थाले अझ बलियो बनाएको छ । उच्च स्थानमा रहेको भूमेस्थान गणेश मन्दिरसम्म पुग्नका लागि चिया बगानको ठीक बीचबाट सुन्दर पदमार्ग निर्माण गरिएको छ । चियाको हरियालीमा हिँड्दै मन्दिर पुग्दा पर्यटकले प्रकृति र आध्यात्मिकताको अनुपम संगम अनुभव गर्न पाउँछन् । यो स्थल हिन्दु र बौद्ध दुवै धर्मावलम्बीका लागि तीर्थस्थलका रूपमा विकास हुँदैछ, जसले गर्दा यसको महत्त्व अझ बढेको छ ।
समग्रमा, घ्याङस्वाराको यो प्रयासले स्थानीय स्तरमा इच्छाशक्ति र सही योजना भएमा प्राकृतिक स्रोतको उच्चतम उपयोग गरी पर्यटन प्रवर्द्धन र आर्थिक उपार्जन गर्न सकिन्छ भन्ने उत्कृष्ट उदाहरण प्रस्तुत गरेको छ । यसले स्थानीय युवालाई गाउँमै रोजगारीको अवसर सिर्जना गर्ने र घ्याङस्वारालाई नुवाकोटको एक नमुना पर्यटकीय गाउँका रूपमा स्थापित गर्ने बलियो सम्भावना देखाएको छ ।