मौसम पूर्वानुमान: देशका विभिन्न भागमा भारी वर्षाको सम्भावना, सतर्क रहन आह्वान
काठमाडौँ, भाद्र २६ गते:
आज राती देशभर सामान्यतया बदली रहनेछ। कोशी प्रदेश, मधेश प्रदेश, बागमती प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेशका केही स्थानहरूमा मध्यम वर्षाको सम्भावना रहेको छ। त्यसैगरी, कर्णाली प्रदेशको थोरै स्थानहरूमा पनि मध्यम वर्षा हुने अनुमान गरिएको छ। विशेषगरी कोशी प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेशका एक-दुई स्थानमा भारी वर्षाको समेत सम्भावना रहेकाले ती क्षेत्रका बासिन्दालाई सतर्क रहन आग्रह गरिएको छ।
भोलि दिउँसो पनि देशभर सामान्यतया बदली रहनेछ। देशका पहाडी भू-भागका केही स्थानमा र तराई भू-भागका थोरै स्थानहरूमा मध्यम वर्षाको सम्भावना छ। कोशी प्रदेश, गण्डकी प्रदेशको पहाडी भू-भाग, लुम्बिनी प्रदेश र सुदूरपश्चिम प्रदेशको पहाडी तथा तराई भू-भागका एक-दुई स्थानमा भारी वर्षाको पनि सम्भावना रहेको विभागले जनाएको छ।
भारी वर्षाका कारण नदीनालामा पानीको बहाव बढ्ने, पहिरो जाने, सडक अवरुद्ध हुने तथा यातायातमा समस्या आउन सक्ने भएकाले सम्बन्धित क्षेत्रका नागरिकलाई आवश्यक सतर्कता अपनाउन विभागले अनुरोध गरेको छ।