पश्चिमी र स्थानीय वायुको प्रभाव: पहाडी भू-भागमा वर्षा र हिमपातको सम्भावना, तराईमा हावाहुरी

काठमाडौँ, चैत २१ गते ।

आज दिउँसो गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा साधारणतया बदली रहनेछ। यी प्रदेशका पहाडी र हिमाली भू-भागका थोरै स्थानहरूमा मेघगर्जन, चट्याङ्ग, असिना र हावाहुरीसहित मध्यम वर्षा तथा हिमपातको सम्भावना रहेको छ। यस्तै, सुदूरपश्चिमको तराई र देशका अन्य हिमाली तथा पहाडी भू-भागका एक-दुई स्थानमा हल्का वर्षा र हिमपातको आकलन गरिएको छ। तराईका केही स्थानहरूमा दिउँसो हावाहुरी चल्ने सम्भावना समेत रहेको छ।

राती पनि देशका पहाडी र हिमाली भेगमा मौसम साधारणतया बदली नै रहने महाशाखाले जनाएको छ। गण्डकी, कर्णाली र सुदूरपश्चिमका पहाडी तथा हिमाली क्षेत्रका थोरै स्थानमा मेघगर्जन र चट्याङ्गसहित मध्यम वर्षा र हिमपात हुनसक्नेछ। अन्य प्रदेशका पहाडी भू-भाग र सुदूरपश्चिमको तराईमा हल्का वर्षाको सम्भावना छ। विशेषगरी कोशी, मधेश, बागमती, गण्डकी र लुम्बिनी प्रदेशका तराईका केही स्थानहरूमा राती हावाहुरी चल्ने सम्भावना रहेकाले आवश्यक सतर्कता अपनाउन मौसमविद्ले सुझाव दिएका छन्।