देशका केही पहाडी भू-भागमा वर्षा र हिमपातको सम्भावना, तराईमा हावाहुरीको जोखिम
काठमाडौँ, २७ चैत । नेपालमा हाल पश्चिमी वायु र स्थानीय वायुको आंशिक प्रभाव रहेकाले देशका विभिन्न भू-भागको मौसममा फेरबदल देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार आज शुक्रबार देशका पहाडी तथा हिमाली क्षेत्रमा वर्षा र हिमपातको सम्भावना रहेको छ।
हालको मौसमको अवस्थाबारे जानकारी दिँदै महाशाखाले कोशी प्रदेश लगायत अन्य हिमाली भू-भागमा आंशिक बदली रहेको जनाएको छ। देशका बाँकी पहाडी तथा तराईका क्षेत्रमा भने मौसम मुख्यतया सफा रहेको छ। यद्यपि, कोशी, बागमती र गण्डकी प्रदेशका पहाडी भू-भागका एक-दुई स्थानमा अहिले हल्का वर्षा भइरहेको छ।
आज दिउँसो कोशी, बागमती र गण्डकी प्रदेशका हिमाली भू-भागमा साधारणतया बदली रहनेछ। कोशी प्रदेशको पहाडी र तराई क्षेत्रका साथै बागमती र गण्डकी प्रदेशका पहाडी र बाँकी हिमाली भू-भागमा आंशिक बदली हुने देखिन्छ। यसैगरी, कोशी प्रदेशका पहाडी र हिमाली क्षेत्रका थोरै स्थानहरूमा तथा कोशीको तराई र बागमती-गण्डकीका हिमाली क्षेत्रका एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेको छ। विशेषगरी लुम्बिनी र सुदूरपश्चिम प्रदेशका तराईका थोरै स्थानहरूमा हावाहुरी चल्ने सम्भावना रहेकाले सतर्कता अपनाउन महाशाखाले अनुरोध गरेको छ।
रातको समयमा पनि कोशी प्रदेशको पहाडी र हिमाली भू-भागमा साधारणतया बदली रहनेछ भने बागमती, गण्डकी र कर्णाली प्रदेशको हिमाली क्षेत्रमा आंशिक बदली हुनेछ। बाँकी क्षेत्रमा भने मौसम मुख्यतया सफा रहने पूर्वानुमान छ। राती कोशी र गण्डकी प्रदेशको हिमाली भू-भागका एक-दुई स्थानमा हल्का वर्षा र हिमपातको सम्भावना रहेको महाशाखाले जनाएको छ।