देशका विभिन्न भू-भागमा मेघगर्जनसहित वर्षा र हिमपातको सम्भावना, सतर्कता अपनाउन अनुरोध
काठमाडौँ, १७ जेठ ।
हालको मौसमको अवस्थालाई हेर्दा गण्डकी, लुम्बिनी, कर्णाली र सुदूरपश्चिम प्रदेशमा साधारणतया बदली रहेको छ भने कोशी, मधेश र बागमती प्रदेशमा आंशिक बदली देखिएको छ । आज आइतबार दिउँसो कोशी र बागमती प्रदेशका हिमाली तथा पहाडी भू-भागका साथै गण्डकी, लुम्बिनी, कर्णाली र सुदूरपश्चिम प्रदेशमा साधारणतया बदली रहनेछ । मधेश लगायत अन्य तराई क्षेत्रमा भने आंशिक बदलीको सम्भावना छ । कोशी, बागमती र गण्डकी प्रदेशका केही स्थानमा तथा मधेश प्रदेशका एक-दुई स्थानमा मेघगर्जन र चट्याङ्गसहित मध्यम वर्षा र हिमपातको सम्भावना रहेको छ । लुम्बिनी प्रदेशको तराई क्षेत्रमा भने आज हावाहुरी चल्ने सम्भावना रहेकाले सतर्कता अपनाउन महाशाखाले आग्रह गरेको छ ।
आज राती देशभरको मौसममा केही सुधार देखिए पनि सुदूरपश्चिम र कर्णाली प्रदेशका हिमाली तथा पहाडी क्षेत्रमा साधारणतया बदली नै रहनेछ । कोशी, बागमती र गण्डकीका पहाडी भू-भागमा आंशिक बदली रहने र तराईका अधिकांश क्षेत्रमा मौसम मुख्यतया सफा रहनेछ । यद्यपि, केही हिमाली र पहाडी स्थानमा भने हल्का वर्षा र हिमपातको सम्भावना कायमै रहनेछ ।
भोलि १८ गते सोमबार पनि मौसममा खासै ठूलो फेरबदल हुने देखिएको छैन । पहाडी र हिमाली भू-भागमा साधारणतया बदली तथा तराईमा आंशिक बदली रहनेछ । सोमबार दिउँसो लुम्बिनी र सुदूरपश्चिम प्रदेशका तराईका थोरै स्थानसहित देशका हिमाली र पहाडी भू-भागमा मेघगर्जन र चट्याङ्गसहित वर्षाको सम्भावना छ । रातीको समयमा भने तराईको मौसम सफा रहने भए पनि उच्च पहाडी र हिमाली क्षेत्रमा हल्का वर्षा र हिमपात हुन सक्ने पूर्वानुमान गरिएको छ ।
त्यसैगरी, जेठ १९ गते मङ्गलबार पनि देशका हिमाली र पहाडी भू-भागमा बदलीको अवस्था रहनेछ । दिउँसो केही पहाडी स्थानमा मेघगर्जनसहित मध्यम वर्षा र हिमपातको सम्भावना छ भने राती कोशी, कर्णाली र सुदूरपश्चिम प्रदेशका पहाडी तथा हिमाली क्षेत्रमा हल्का वर्षाको सम्भावना रहेको छ । वर्षा, हिमपात र चट्याङ्गको जोखिम रहन सक्ने भएकाले आवश्यक सावधानी अपनाउन मौसम पूर्वानुमान महाशाखाले सबैमा अनुरोध गरेको छ ।