खुर्मीका कुमारको काँक्रो उद्यम: सरकारी साथ पाए १०० युवालाई व्यावसायिक बनाउने अठोट
बागमती (ललितपुर) – दक्षिण ललितपुरको बागमती गाउँपालिका वडा नं. ७, खुर्मीका युवा कृषक रेम बाहादुर “कुमार” घिमिरेले गाउँमै व्यावसायिक काँक्रो खेती गरेर उदाहरणीय काम गर्नुभएको छ। कुनै पनि तहको सरकारी सहयोग बिना नै उहाँले यो सिजनमा करिब ३० देखि ५० क्विन्टलसम्म काँक्रो उत्पादन गरी बिक्री गर्ने लक्ष्य राख्नुभएको छ।
आफ्नै लगानी र अथक मेहेनतले व्यावसायिक कृषिमा होमिनुभएका घिमिरे आगामी दिनमा आफ्नो खेतीलाई अझ परिष्कृत र विस्तारित गर्दै उत्कृष्ट उत्पादन लिने सोचमा हुनुहुन्छ। गाउँको उर्वर भूमिमा पसिना बगाइरहेका उहाँले कृषि कर्मबाटै आत्मनिर्भर बन्न सकिने सन्देश प्रवाह गरिरहनुभएको छ।
कृषक घिमिरेले यदि राज्यबाट उचित सहयोग, प्रविधि र प्रोत्साहन पाएमा आफूजस्तै गाउँका अन्य १०० जना युवालाई व्यावसायिक कृषिमा आकर्षित गरी उनीहरूलाई आत्मनिर्भर बनाउन सकिने दृढ विश्वास व्यक्त गर्नुभएको छ। “अहिले मैले आफ्नै बलबुताले यति गरेको छु,” उहाँले भन्नुभयो, “यदि स्थानीय वा प्रदेश सरकारबाट थोरै मात्रै भए पनि प्राविधिक वा आर्थिक सहयोग पाएँ भने यो उत्पादनलाई दोब्बर बनाउन सक्छु र मसँगै अरु साथीभाइलाई पनि यो पेशामा ल्याएर गाउँमै रोजगारी सिर्जना गर्न सक्छु।”
घिमिरेको यो प्रयासले स्थानीय स्तरमा कृषि उद्यमशीलताको प्रचुर सम्भावना रहेको देखाएको छ। सरकारी निकायको सानो सहयोगले पनि ग्रामीण युवाहरूलाई कृषिमा टिकाइराख्न र व्यावसायिक बनाउन सकिने उहाँको अनुभवले प्रष्ट पारेको छ। उहाँको यो पहलकदमीले राज्यका सम्बन्धित निकायको ध्यानकर्षण गराउन आवश्यक देखिन्छ, ताकि कुमार घिमिरेजस्ता कर्मठ युवा कृषकहरूको सपना साकार हुन सकोस् र ग्रामीण अर्थतन्त्र बलियो बनोस्।