धेरैलाई मन नपर्ने तरकारी हो, भन्टा ! किन खाने ? जान्नुहोस ७ अद्भूत फाइदाहरू
धेरैको भान्सामा नियमित पाक्ने तर कतिपयलाई मन नपर्ने तरकारी हो, भन्टा । तर के तपाईंलाई थाहा छ? साधारण देखिने यो भन्टा पोषक तत्वहरूको खजाना हो । संसारभरि चाइनिज, जापनिज, ग्राफिटी, थाई जस्ता विभिन्न प्रकारमा पाइने भन्टामा एन्टिअक्सिडेन्ट, भिटामिन, फाइबर र खनिज पदार्थ भरपुर मात्रामा हुन्छन् ।
यसले हाम्रो छाला र कपाललाई मात्र नभई समग्र स्वास्थ्यलाई नै फाइदा पुऱ्याउँछ । आउनुहोस्, भन्टा खानुका अद्भूत फाइदाहरू र ध्यान दिनुपर्ने कुराहरूबारे विस्तृतमा जानौं ।
भन्टा सेवनका ७ अद्भूत फाइदाहरू
१. तत्काल ऊर्जा र स्फूर्ति
भन्टामा पाइने औषधीय गुणले शरीरलाई तत्काल ऊर्जा प्रदान गर्छ । यसमा चिल्लो पदार्थ निकै कम हुने भएकाले यो स्वास्थ्यका लागि लाभदायक छ । नियमित सेवनले शरीरको थकान, अल्छीपना र सुस्तता हटाउन मद्दत गर्छ ।
२. रोग प्रतिरोधात्मक क्षमता बढाउँछ
भन्टा भिटामिन ए, सी, डी, बी-कम्प्लेक्स (बी२, बी६, बी१२) का साथै सेलेनियम, आइरन र जिंक जस्ता तत्वहरूको उत्तम स्रोत हो । यी पोषक तत्वहरूले शरीरको रोग प्रतिरोधात्मक क्षमतालाई बलियो बनाउँछन् र विभिन्न संक्रमणबाट बचाउँछन् ।
३. तौल घटाउन सहयोगी
यदि तपाईं मोटोपनाको समस्याबाट चिन्तित हुनुहुन्छ भने भन्टा तपाईंको लागि उत्तम विकल्प हुन सक्छ । यसमा पानी र फाइबरको मात्रा उच्च हुन्छ भने क्यालोरी नगन्य हुन्छ, जसले गर्दा थोरै खाँदा पनि पेट भरिएको महसुस हुन्छ । यसले अनावश्यक खानपान नियन्त्रण गरी तौल घटाउन मद्दत गर्छ ।
४. मस्तिष्क स्वास्थ्य र स्मरणशक्तिमा सुधार
भन्टामा पाइने फोलेट, आइरन, जिंक र भिटामिनहरू (ए, बी, सी) ले मस्तिष्कको कार्यक्षमता बढाउन मद्दत गर्छन् । यसको सेवनले स्मरणशक्ति तेजिलो बनाउनुका साथै मुडलाई राम्रो र खुसी राख्न पनि सहयोग पुऱ्याउँछ ।
५. स्वस्थ र बलियो कपालका लागि
भन्टामा पाइने पानी, भिटामिन र खनिजहरूले कपालको जरालाई बलियो बनाउन आवश्यक पोषण प्रदान गर्छन् । कपाल झर्ने समस्या कम गर्न तपाईं भन्टालाई पिसेर त्यसको पेस्टलाई कपालको जरामा लगाई केही समयपछि पखाल्न सक्नुहुन्छ ।
६. चम्किलो र स्वस्थ छाला
भन्टामा रहेको फाइबर, भिटामिन र खनिजले छालालाई भित्रैबाट हाइड्रेट राख्न मद्दत गर्छ । यसले छालालाई सूर्यको हानिकारक किरणबाट जोगाउँछ र प्राकृतिक चमक कायम राख्छ ।
-
घरेलु उपाय: भन्टाको पेस्टमा मह र एलोभेराको रस मिसाएर अनुहारमा लगाउनुहोस् । १० मिनेटपछि पखाल्दा छाला नरम र चम्किलो हुन्छ ।
७. मुटु स्वास्थ्यका लागि फाइदाजनक
भन्टामा पाइने फाइबर र एन्टीअक्सिडेन्टले शरीरमा खराब कोलेस्ट्रोलको मात्रा घटाउन मद्दत गर्छ, जसले गर्दा मुटु स्वस्थ रहन्छ ।
भन्टा खाँदा अपनाउनुपर्ने सावधानीहरू
फाइदा नै फाइदाले भरिपूर्ण भए तापनि भन्टाको सेवन गर्दा केही कुरामा ध्यान दिनु जरुरी छ:
१. तारेको भन्टा हानिकारक: भन्टालाई तारेर वा डिप फ्राई गरेर खाँदा यसले अत्यधिक तेल सोस्छ । यसो गर्दा यो स्वस्थकर रहँदैन र तौल बढाउने, मुटुसम्बन्धी समस्या निम्त्याउने जोखिम हुन्छ ।
२. औषधी सेवन गरिरहनुभएको छ भने: डिप्रेसनको औषधी सेवन गरिरहेका व्यक्तिहरूले भन्टा नखानु राम्रो हुन्छ, किनकि यसले औषधीको असरलाई कम गर्न सक्छ ।
३. पत्थरीको समस्या: यदि तपाईंलाई मिर्गौला वा पित्तथैलीमा पत्थरीको समस्या छ भने भन्टाको सेवनबाट टाढै रहनुहोस् । यसले दुखाइ बढाउन सक्छ ।
४. एलर्जीको जोखिम: केही व्यक्तिलाई भन्टाको सेवनले छालामा एलर्जी (चिलाउने, डाबर आउने) हुन सक्छ । यस्तो कुनै लक्षण देखिएमा यसको सेवन बन्द गर्नुहोस् ।
५. पेटको समस्या: अत्यधिक मात्रामा भन्टा खाँदा पेट दुख्ने, पोल्ने वा ग्यासको समस्या देखिन सक्छ ।
६. न्यून रक्तचाप: यदि तपाईंको रक्तचाप कम रहने समस्या छ भने भन्टा खानुअघि चिकित्सकको सल्लाह लिनुहोस् ।
भन्टा स्वास्थ्यका लागि निकै फाइदाजनक तरकारी हो, तर यसको सेवन सही तरिकाले र सीमित मात्रामा गर्नुपर्छ । तारेको वा धेरै चिल्लो बनाएर खानुको सट्टा उसिनेर, पोलेर वा हल्का तरकारी बनाएर खानु उत्तम हुन्छ ।
विशेष नोट: गर्भवती वा स्तनपान गराइरहेका महिलाहरू, कुनै गम्भीर रोगबाट पीडित व्यक्तिहरू वा विशेष डाइटमा रहेकाहरूले आफ्नो खानामा भन्टा समावेश गर्नुअघि चिकित्सक वा पोषणविद्को सल्लाह लिनु अनिवार्य छ ।